COSACI

COSACI

populi Poloniae, qui primum exiisse dicuntur ex insul. borysthenis, in cuius etiamnum ostiis vivunt. Turcis terribiles, sub nomine Russorum: Ducem habent proprium sub dominio Poloniae Regis. Classe ad Pontum Euxinum excurrentes, Constantinopolim obsederunt, A. C. 860. sub Michaele Imperatore, sed re infectâ inde discedentes, ex captivis religionem Christianam didicerunt, M. Cromer. Hist. Pol. l. 2. Ab iisdem Achmetes Imperator Turcicus mire vexatus est, A. C. 1616. Thraciâ, Bithyniâ, Paphlagoniâ, Trapezunte, Sinope, etc. devastatis. Contra Uladislaum IV. rebelles, ab illo fortiter, repiessi sunt, A. C. 1629. Habitant in Volhinia inferiore, alias Ucrania: Eorumque pars nunc sub clientela Moscovit. Ritus graecos servant, dicti a voce Ruthenica Cosac, i. e. miles vagus. Vide P. de Valle, Itin. tom. 2. et 3. Hornio colluvies est ex Plonis, Lituanis, ac Russis collecta, qui, cum vel capitale facinus admisere, vel nimiâ servitute a Dominis oppressi sunt, in patentes vastosque ad Borysthenem campos se recipiunt, tuti ab aliorum invasionibus, et omnium circum circa gentium terror. Ducem ex suis praestantissimum eligunt, qui plenô in eos imperiô utitur. Quomodo perpetui in armis, ex praeda undique congesta vivunt: venalis exercitus, et modo Moscis, modo Polonis graves, praesertim cum Tartaris Precopensibus iunguntur. Numerus ad 100000. Equitum assurgit, Turcis inprimis formidabiles. Vide eum in Orbe Polit. et in voce Ucraina.